UM AÐFERÐINA
Munurinn á bók og bókverki er ekki alltaf augljós. Segja má að bók sé umgjörð eða form sem inniheldur sögur, frásagnir eða upplýsingar á meðan bókverk er myndlistarverk í bókarformi þar sem bókin er sjálft verkið og formið órjúfanlegur hluti af hugmynd verksins. Bóklist getur sameinað mismunandi listform og verið á mörkum hefðbundinna bóka og bókverka og brotið upp hefðbundnar hugmyndir manna um prentlist og myndlist.
Aðferðir við bókagerð eru margvíslegar, það geta verið pappírsbrot, klippitækni og skurður, textílaðferðir, málun og teikning, þrykkaðferðir og margar greinar þrívíðrar sköpunar og höggmyndalistar. Verkin geta verið óvenjuleg að lögun, síðurnar skornar eða gataðar, efniviðurinn óhefðbundinn og jafnvel haft ákveðna lykt. Bókverkin innihalda myndir, texta eða hvort tveggja sem er hluti af formi og hugmyndalegu markmiði verksins og enn önnur hafa ekkert innihald nema hugmyndina sjálfa og formið sem í því felst. Verkin eru oftast unnin og gefið út af listamanninum sjálfum eða litlum forlögum sem sérhæfa sig í gerð bókverka. Margir listamenn hafa gert frumlegar og skemmtilegar tilraunir með bókarformið og teygt og togað mörk þess.
Tengsl bóka og myndlistar eiga sér langa sögu sem kemur helst fram í skreytingum og myndlýsingum í bland við texta. Bækur voru þá gjarnan metnar eftir útliti, hvernig þær voru skreyttar eða búnar eins og til dæmis íslensku skinnbækurnar og handritalýsingar fyrr á öldum. Það var þó ekki fyrr en á 19. öld sem menn fóru að tengja bókarformið við hugmynd verksins. Þetta kom fram í tilraunum skálda og myndlistarmanna með letur, leturstærðir og uppsetningu bókanna.
